Bidasoak huts egin du

BARCELONA B: Galán (1), Laliga, Rey, Gomez (7), Dujshevaeb (7), Revuelta, Boada (4), Tremps (6), Ceretta (4), Ledo, Oliveras, Castro, Villoria, Perez-Ortiz, León, Deumal.

BIDASOA: Dejanovic, Cavero, Vazquez (2), Martínez (5), Crowley (10), Beltza, Portero (1), Villar (1), Kauldi (3), Zubiria, Muiña (5), Bezbradica, Mouriño, Davidovic, Azkue.

MARKAGAILUA: 2-3, 6-5, 8-10, 11-12, 12-13, 15-14 (atsedenaldia); 18-19, 22-20, 27-22, 27-24, 28-26, 31-27.

Liga irabazita Asobal ligara zuzenean igotzeko helburua zaildu egin zaio Bidasoari. Valladolid ematen ari den maila kontuan hartuta, ezin zuen estropezurik egin. Barça Bk, ordea, irundarren asmoak zapuztu ditu. Joan Gamper pabiloian galdu du Bidasoak, eta eskura utzi dio igoera zuzena Valladolid aurkariari. Norgehiagoka berdindua izan da, orokorrean, lehen zatian. Bi goleko abantaila hartu dute bidasoarrek behin baino gehiagotan, baina atsedenaldiaren aurretik etxeko taldea aurretik jarri du Daniel Dujshebaevek, bi gol segidan sartuta.

Ondo hasi da Bidasoa aldagelatik bueltan, eta bi goleko abantaila lortu du berriro, bosgarren minuturako. 18-20koa sartu du Cristian Martinezek. Barçaren erantzuna, ordea, harrigarria izan da. Markel Beltzaren esklusioa aprobetxatu eta 6-0ko partziala osatu du. 24-20ra ihes egin du horrela. Garaipenaren oinarri izan da fase hori. Bidasoak hobera egin du hurrengo minutuetan, irabazteko beharrak bultzatuta. 24.minutuan 27-26koa sartu du Crowleyk, eta itxaropena berreskuratu dute bidasoarrek. Baina etxekoek bi gol sartu dituzte minutu bakarrean. Kolpe erabakigarria izan da. Burumakur utzi du Bidasoak Bartzelona, baina azkar altxatu beharko du, denboraldia ez baita Joan Gamperren amaitu. Igoera zuzena eskuraezina izango dela dirudi, baina play off-aren bidea ere badago.