Bidasoak gol bakarragatik galdu zuen Granollersen kontra

Bidasoa Irunek 36-35 galdu zuen pasa den larunbatean Fraikin BM Granollersen kontra. Azken jokaldian erabaki zen neurketa eta etxekoen alde erori zen markagailua, gol bakarragatik. Porrota ahantzi eta Europako Txapelketako erronkari eutsi beharko diote Alex Mozasen jokalariek. 

Erritmo handiz jokatu zuten lehen zatian. Erasoan, bi taldeek ere eraginkortasuna erakutsi zuten eta atsedenaldira, 19-20ko markagailuarekin ailegatu ziren. Bidasoa gailendu zen zenbait partzialetan, bi eta hiru goleko aldeak ere lortuz (8-11, 18. minutuan). Granollersek emaitza hau berdintzea lortu zuen, 15-15koarekin, baina azken minutuetan, Rodrigo Salinasek sartutako penalti bati esker, aldageletara aitzinetik joan ziren irundarrak. 

Bigarren zatian, talde horiak bere alde jarri zuen emaitza, nahiz eta etxekoek indarra erakutsi kantxan eta hau iraultzeko gai izan. Bi goleko aldea izan zen bi taldeen artean lortutako handiena, 26-24koa Granollersen alde. Berdinketak izan ziren nagusi bigarren ordu erdian, 23nakoa, 26nakoa, 29nakoa, 30nakoa eta 33nakoa ipiniz markagailuan. Azken partziala ordea, kataluniarren aldekoa izan zen. Deumalen azken golak 36-35koa ezarri zuen eta neurketa bukatzeko lau segundu gelditzen zirenean, Alex Mozasek hutsartea eskatu zuen, itxaropena mantentzeko helburuarekin. Horren ondotik, Asier Nietok azken jaurtiketa bat egin zuen, baina Panittik ongi gelditu zuen eta beraz, etxean gelditu zen garaipena. 

Porrot hau ahantzi eta biharko neurketa prestatu beharko du Bidasoak, azaroaren 26koa. EHF European Leagueko Multzo Faseko azken jardunaldia izanen da, Ystads taldearen kontra, Artalekun, 20:45ean. D multzoko liderrak izateko neurketa erabakigarria izanen da, baita hurrengo fasera bi puntu gehiagorekin pasatzeko ere. 

Gorka Nieto kapitainak egin zuen neurketaren balorazioa.