Bidasoak Cangas garaitu zuen atzo ilunabarrean

2025/03/31
Talde horiak 30-31ko markagailua estuarekin irabazi zuen atzo Cangasen kontra. Azken segunduetan bisitariek ongi eutsi zieten etxeko taldearen erasoei eta jardunaldiko bi puntuak eskuratu zituzten, sailkapeneko hirugarren postura igotzea ere lortuz.
Bidasoak Cangas garaitu zuen atzo ilunabarrean
Frigoríficos del Morrazo 30
31 Bidasoa Irun

Bidasoa Irunek 30-31ko markagailuarekin garaitu zuen atzo ilunabarrean Cangas taldea. Lehen minutuetatik aitzinetik jartzea lortu zuten bisitariek, baina indarrez aritu ziren etxekoak ere garaipena eskuratu nahiean. Azken segundura arte iraun zuen bi taldeen arteko borrokak eta Alex Mozasen taldeak, defentsa lan sendoarekin, lortu zuen jardunaldi bi puntuak poltsikoratzea. 

Lehen zatiko hasierako minutuetan nabarmendu zen dagoeneko Bidasoa. 1-4ko partziala eginez, aldea ireki zuen markagailuan bere alde. Hala ere, Cangasek segidan erantzun eta 4-0eko bertze partzial batekin, emaitza irauli egin zuen. Bi taldeek erritmoa handitu egin zuten partiduak aurrera egin ahala eta parekatuak ibili ziren ere. Bidasoak defentsan lan sendoa egin zuen azken ordu laurdenean eta David Failderen geldiketak erabakigarriak izan ziren berriz ere markagailuan tartea irekitzeko. Lau goleko errenta lortu zuen talde bisitariak atsedenaldira bidean, nahiz eta azkenik, lehen ordu erdia agortuta, 11-14ko emaitzarekin joan ziren bi taldeak aldageletara.

Bigarren zatian, indarrez kantxaratu ziren Cangaseko jokalariak eta 6-0eko partziala eginda, bi goleko abantaila lortu zuten markagailuan (23-21). Bidasoak gogor eutsi zion partiduari eta 0-4ko partzial batekin erantzun zuen, neurketaren kontrola berreskuratuta (25-26). Partiduko azken txanpari oso parekatuak ailegatu ziren bi taldeak eta borroka azken segundura arte iraun zuen. Tirabiraka ibili ziren bi aurkariak, markagailua alde batera eta bertzera eramanez etengabe. Hala ere, David Failderen nagusitasunarekin berriz ere, aldea ireki zuen Bidasoak azken minutuan (28-31). Garaipena eskura zutela uste zutenean aldiz, estutasuna eragin zieten horiei etxekoek golek. Bi gol gehiago lortu zituen Cangasen azken minutuan, baina hala ere, ez zen nahikoa izan bidasotarrei garaipena kentzeko. 

Azkenik, 30-31eko markagailuarekin bukatu zen neurketa eta Bidasoak jardunaldiko bi puntuak poltsikoratu ahal izan zituen, sailkapeneko hirugarren postuan bukatuz asteburua.