BIDASOAK BIHAR HITZORDU GARRANTZITSUA IZANGO DU BARTZELONAN

Irundarrak bihar Palau Blaugranan arituko dira Barcelonaren aurka, eguerdiko 12etan

Bidasoak bihar emango dio jarraipena otsaileko egutegi bete honi, eta sailkapeneko lehenengoaren aurka duen partiduarekin egingo du. Izan ere, irundarrek, eguerdiko 12etan, hitzordua izango dute Palau Blaugranan Barçaren aurka, Sacyr Asobal Ligako 18. jardunaldia jokatzeko.

Jacobo Cuetara entrenatzaileak aurreikusi duen moduan, “neurketa oso zaila izango da guretzat bizi dugun egoera ikusita. Oso baldintzatuak goaz lehiakor izateko”. Izan ere, Jon Azkue eta Rodrigo Salinasen bajei Adrian Fernandezena ere gehitu behar zaio, atzoko partiduan min hartu eta ezin izan baitu taldearekin bidaiatu. Baldintza hauek kontuan hartuta, Bidasoa harrobiko gazteekin kantxaratuko da Bartzelonan, Nieto, Furundarena, Urruzola eta Mujikaz gain, Asier Iribar zumaiarra sartu baita biharko deialdian. Biharko norgehiagoka beraz, “esperientzia hartzeko balioko digu, batez ere gazteei”, aipatu du Cuetarak, “momentu honetan gazteen taldea portzentai altu bat da lehenengo taldean, eta talde honek hobera egiten badu besteek ere hobera egingo dugu”.

Gauzak horrela, bihar eguerdiko 12etan Bidasoa kontu handiarekin ibiliko da Palau Blaugranan, prestatzaileak aurreratu duenez: “Kontuz ibili behar gara horrela neurketetan. Partidu asko ditugu oso denbora gutxian eta ezin dut taldea ahuldu”.