BIDASOAK BIGARREN POSTUA GALDU ZUEN HUESCAN

Talde irundarrak larunbatean jokatu zuen Huescaren kontra eta 30-29ko markagailu estuarekin galdu zuen

Bidasoak Huescaren kontra jokatu zuen pasa den larunbatean, denboraldiko Asobal Ligako azken-aurreko partiduan. Talde irundarrak garaipena eskuratzeko aukera izan bazuen ere, azkenean etxeko taldeak eraman zuen garaipena, 30-29ko markagailuarekin. Emaitzak honek eta Granollersek Torrelavegan lortutako garaipenak Bidasoa hirugarren postura jeistea ahalbidetu du.

Jacobo Cuetararen taldea ongi sartu zen kantxara eta lehen abantaila lortu zuen hasi eta berehala. Hala ere, galtzeko ezer ez zuen etxeko taldeak indarra hartu eta markagailua bereganatu zuen, lau goleko aldea irekiz bi taldeen artean (12-8, 19. minutuan). Bidasoak, atsedenaldia baino lehen, honi erantzun eta hutsune hori erdira murriztea lortu zuen baita ere, 17-15koa ezarriz bigarren zatia hasteko.

Bigarren zatia hasi eta hamar minutura, Jon Azkuek berdinketa lortu zuen markagailuan, baina Huescak lehian gogor jarraitu zuen eta berriz ere aurretik jarri zen. Hurrengo minutuetan, Xoan Ledoren eta Adrian Fernandezen lanari esker, Bidasoak puntu bateko errenta eskuratu zuen (23-24). Partidua amaitzeko bost minutu falta zirenean aldiz, etxeko taldeak aukerak aprobetxatu zituen eta Bidasoa menderatzea lortu zuten, 30-29ko markagailu estuarekin.

Horrela, puntuak Huescan geratu ziren eta Bidasoak sailkapeneko bigarren postua galdu zuen berriz ere, bi puntuko aldea irekiz Granollersekin. Nahiz eta zaila izango den, Irungo taldeak azken aukera izango du igande honetan postua berreskuratzeko. Denboraldiko azken neurketa izango da hau eta Artalekun jokatuko dute, Benidormen kontra, arratsaldeko 17etan.

(Argazkia: Arrate Morales)