BIDASOAK BIGARREN ITZULIKO ABONAMENDUAK ESKURAGARRI JARRI DITU

Otsailaren lehen asteburuan hasiko da bigarren itzulia eta Bidasoak Artalekuren ezinbertzeko babesa eskatu du

Gabonetako atsedenaldian sartuta dago Bidasoako lehen taldea, baina dagoeneko bigarren itzuliari begira jarri da. Erronka garrantzitsuak izanen ditu otsailaren lehen asteburutik aitzinera eta horretarako, Artalekun babesa ezinbertzekoa duelako, urte erdiko abonamenduak jarri ditu eskuragarri gaur.

Otsailetik aurrera, Artalekun Plenitude ASOBAL Ligako zortzi hitzordu garrantzitsu izanen ditu Bidasoak, eta sailkapeneko lehen zortzi postuetan dauden sei talde etorriko dira, hala nola, TM Benidorm, Batcho Torrelavega, Barça, Logroño La Rioja, Cisne, Abanca Ademar, Rebi Cuenca eta Angel Ximenez Puente Genil.

Neurketa hauetan guztietan, Bidasoak zaleen babesa ezinbertzekoa du eta horretarako, klubak urte erdiko abonamenduak jarri ditu salgai gaurtik aitzinera. Hauen prezioak ere agitara eman dituzte: helduen kategoriako abonamenduak 80 euroko kostua izanen du, senior eta junior kategoriakoak 57 eurokoa, langabetuenak eta gazteenak 50 eurokoa eta haur kategoriakoak 14 eurokoa.

Abonamenduak bazkideak@cdbidasoa.eus helbidean eskatu beharko dira, nahiz eta aurrez aurre ere izena eman daitekeen. Azken aukera honetan bi epe zabalduko dira. Lehena abenduaren 23a bitarte izanen da, bulegoetako ohiko ordutegian, eta bigarrena, urtarrilaren 9tik aitzinera.

Norgehiagokei begira, bazkiden batek ezin badu Artalekura joan partidu bat ikustera, bere karneta senide edo lagun bati uzteko aukera izanen du. Hau bazkideak berak kudeatu dezake, aplikazioaren bidez, Bazkidearen Eremu Pribatuan. Ezin badio sarrera inori utzi, jardunaldi horretan eserlekuari uko egiteko aukera ere izanen du bertan. Klubak hau egitea eskatzen du, leku hori salgai jartzeko aukera edukitzeko, batez ere eskari handia duten partiduetan.