Bidasoak bi puntu gehiago eskuratu zituen Villa de Arandaren kontra

Bidasoa Irunek 37-24ko markagailuarekin irabazi zuen atzo ilunabarrean Villa de Aranda taldearen kontra. Azken ordu laurdenean erabaki zen partidua, etxekoek erritmoa jarri zutenena eta indarrez erasoan eta defentsan fin ibili zirenean. Jardunaldiko bi puntuak eskuratuta, aurtengo helburuak lortzeko bidean sartu da Alex Mozasen taldea. 

Lehen zatian indarrez kantxaratu zen Bidasoa eta hasieratik erakutsi zuen irabazteko grina. Bi goleko abantaila lortu zuten segidan, minutuak pasatu ahala, seira igo zena (12-6, 16. min). Villa de Arandak ez zituen besoak jeitsi eta hurrengo ordu laurdenean lanean segitu zuten abantaila hori murriztuz. 13-10ekoa ezarri zuen bisitariak eta Alex Mozas hutsartea eskatzera behartu zuen. Atsedenaldira bidean, aurkariaren defentsa indartu zen eta etxekoentzat zaila izan zen hori haustea. Neurketa parekatu zen orduan, nahiz eta oraindik ere horiak aitzinetik zeudena, 16-14ko emaitzarekin. 

Aldageletatik bueltan, bi taldeen arteko parekotasuna handiagoa izan zen eta horrek islada izan zuen markagailuan ere, lehen ordu laurdenean zenbait berdinketa egon baitziren. Burgosko taldea aitzinetik ere jartzeko aukera aprobetxatu zuen tarte batean eta Alex Mozasek, berriz ere, hutsartea eskatu zuen bere taldearen norabidea zuzentzeko. Erabaki ona izan zen eta eraginkorra, orduz geroztik Bidasoak bere kemena erakutsi eta neurketa irabazteko lehen pausuak eman zituelako. 5-1eko partziala eginez, nagusitasuna berreskuratu zuen eta garaipena erabakita utzi. David Failderen lanak zerikusi handia izan zuen hemen, Villa de Arandaren erasoak gelditu zituelako eta markagailua bere taldearen alde mantendu zuelako. Abantaila handituz joan zen eta azkenik, zazpi goleko aldearekin bukatzea lortu zuen Bidasoak, 37-24koarekin. 

Garaipen honekin, eta bertze bi puntu batuta sailkapenera, aurtengo helburuak lortzeko lehen pausuak eman ditu Bidasoak. Heldu den larunbatean, martxoaren 22an, berriz ere etxean ariko da taldea eta bertan, Torrelavega jasoko du (20:00).