BIDASOAK BESTE BI PUNTU BATU DITU ARTALEKUN

Talde irundarrak 39-25ko markagailuarekin irabazi zion Guadalajarari

Bidasoak aurtengo denboraldiko lehen fasea bertze garaipen batekin itxi du. Izan ere, pasa den larunbatean, Guadalajara taldea hartu zuen mendean 39-25ko markagailu zabalarekin. Horrela, sailkapenera bertze bi puntu garrantzitsu batu zituen talde irundarrak Artalekun.

Neurketa hasi eta lehen bost minutuetan, Guadalajara aurretik jarri zen markagailuan. Etxeko taldeari partidan sartzea kostatu zitzaion, baina segidan erantzun eta markagailua iraultzea lortu zuen, 6-0eko partzial bati esker. Horrela, baita Skrzyniarz-ek atean egindako lanari esker, Bidasoak 18-13ko markagailua ezarri zuen atsedenaldirako.

Bigarren zatian ere talde irundarrak bere nagusitasuna erakusteko aukera eduki zuen. Lehen minutuetan dagoeneko, errenta zortzi golera zabaltzea lortu zuten eta, pixkanaka, markagailuko tarte hori oraindik ere handiagoa egin zuten. Nieto, Urruzola, Mujika eta Iribar gazteen protagonismoarekin, azkenik, Bidasoak 39-25ko markagailuarekin irabaztea lortu zuen.

Honen ondotik, Bidasoak asteazken honetan jokatuko du Euskal Kopako finalaurrekoa Tolosaren kontra, Tolosan bertan. Ligako hurrengo jardunaldia, aldiz, urriaren 22ko asteburuan jokatuko dute Logroño La Riojaren kontra, Palacio de los Deportes La Rioja kantxan.

(Argazkia: Arrate Morales)