Bidasoak berdinketa erdietsi zuen Torrelavegaren kontra

Bidasoa Irunek eta Bathco Torrelavegak 25nako berdinketarekin bukatu zuten elkarren kontra jokatutako neurketa. Artaleku goraino bete zuten bi taldeetako zaleek eta giro ederra bizi izan zen elkar ongi ezagutzen duten bi taldeen arteko partiduan. Joko parekatua izan zuten biek ere eta behin-betiko markagailuan izan zuen horrek islada. 

Bi taldeak indartsu kantxaratu ziren Artalekun, batez ere defentsa sendoa erakutsiz. Bidasoako eta Torrelavegako atezainek lan ona egin zuten eta bata zein bertzearen erasoan gelditu zituzten, gol gutiko lehen bost minutuak jokatuz. Jokoaren erritmoa azkartu zuten ondotik, eta bisitariak abantaila hartzen hasi ziren lehen ordu laurdena pasatuta. 1-3ko partzialarekin, 5-8ko markagailua ezarri zuten, nahiz eta kantabriarren nagusitasunak ez zuen gehiegi iraun. Bidasoak ere bere indarra erakutsi zuen eta 4-0eko partzial baten ondotik, 9-8ko emaitza jarri zuen bere alde. Hala ere, parekotasuna izan zen nagusi eta horrela joan ziren atsedenaldira ere, 12-13ko emaitzarekin. 

Bigarren zatia bide beretsutik joan zen, nahiz eta Torrelavegak mantendu zuen nagusitasuna. Abantaila, hala ere, ez zen handia izan, gehienez ere bi goleko aldea lortu baitzuen Jacobo Cuetararen taldeak azken ordu erdian. Bidasoak bere defentsa sendotu eta berdinketa lortu zuen, neurketak ihes ez egitea eraginez. Azken hamar minutuak tentsio handikoak izan ziren eta zaleek gogor bultzatu zuten etxeko taldea. Horri eutsita, David Faildek lan ona egin zuen atean eta protagonista bilakatu zen, berdinketa lortzeko bidean. Hiru minutu falta zirenean, Bidasoa aitzinetik jarri zen, nahiz eta Torrelavegak ez zuen amore eman. Azken segunduetan, etxeko zaleentzat eztabaidatsua izan zen penaltia adierazi zuen epaileak eta Jacobo Cuetararen taldeak eskuan izan zuen garaipena. Faildek ongi erantzun zuen orduan eta 7 metroko jaurtiketa gelditzeko gai izan zen, 25-25ko markagailua lortzeko eta puntuak banatzeko.