Bidasoak antolatuko du igoera fasea

ZAMORA: Abalos (1), Alonso (3), Ceballos (2), García (1), Gómez (1), Grande, Maciel, Martín (6), Molina (2), Prieto, Reyes (2), Ruiz, Miguel, Maide (1), Martín Hernández (1), Sandin (4).

BIDASOA: Dejanovic, Zubiria, Azkue (4), Beltza, Bezbradica, Cavero, Crowley (4), Davidovic (1), Martínez (7), Mouriño (2), Muiña (6), Odriozola (5), Portero, Vázquez (2).

MARKAGAILUA: 1-2, 4-4, 5-7, 9-10, 11-12,14-14 (atsedenaldia), 15-18, 17-21, 18-24, 20-26, 22-29, 24-31.

Artaleku kiroldegiak hartuko du Asobal ligara igotzeko lauko finala. Azken orduko aldaketa izan da sailkapen nagusian, eta Bidasoa izan da bigarren. Hortaz, fasea antolatuko du ekainaren 4an eta 5ean. Helburu hori erdiestea ez zegoen irundarren esku, baina bete beharreko baldintzak bete dira azken jardunaldian. Bidasoak Zamoran irabazi zuen larunbatean, sailkapeneko laugarrenaren etxean. Palma del Riok aski zuen Ciudad Realen irabaztearekin, baina 25-24 galdu zuen, eta hirugarren postuan amaitu du liga, Bidasoaren atzetik. Bide batez, Ciudad Realek play off-a jokatzeko txartela eskuratu du, Juanfersa Gijonek Navan galdu ondoren.

Ezinbesteko baldintza zen Bidasoak Zamora mendean hartzea. Arerio gogorra zuen, eta lehen zatian, norgehiagoka estua izan zen. Bi goleko abantailak izan zituzten irundarrek, baina berdinduta amaitu zen lehen zatia (14-14). Zamorak baino askoz gehiago zuen Bidasoak jokoan, eta bigarren zatian agerian gelditu zen diferentzia hori. Irteera bizia izan zen bidasoarrena, eta 15-19ko aldea zabaldu zuten 5 minutuko epean. Crowleyk segidan sartutako bi golek 18-25ekoa jarri zuten markagailuan, 47.minutua bete aurretik. Hortik aurrera, amaiera lasaia izan zuen Bidasoak kantxan, baina urduri jarraitu zituen Quijote Arenako berriak. 13-18 ere galtzen ibili ondoren, markagailuari buelta eman zion Ciudad Realek, Palma del Rio mendean hartzeko. Igoera fasean sartu zen horrela, eta mesede handia egin zion Bidasoari.

2016an jasandako kolpe gogorrak atzean utzi eta Asobal Ligara igotzeko aukera bikaina izango du Bidasoak bi aste barru. Artaleku kiroldegian antolatuko du igoera fasea. Ciudad Real izango du aurkari larunbatean, lehen finalerdian. Bestean, Palma del Rio eta Zamora ariko dira, igandeko finalera sailkatzeko helburuarekin. Lau talde horietatik bakarra igoko da Asobalera.