BIDASOAK ANTEQUERA JASOKO DU BIHAR ARTALEKUN

Otsailari bukaera emateko Bidasoa Antequera taldearen aurka arituko da etxean

Bidasoak, otsaila honetan hainbat helburu lortuta, azken neurketari aurre egingo dio bihar etxean. Oraingo honetan, Antequera taldea jasoko du Artalekun, klubak zenbait ekitaldi antolatu dituen arratsaldean. Partidua arratsaldeko 18:30ean hasiko da.

Jacobo Cuetara entrenatzaileak norgehiagokaren atarikoan aipatu duen moduan, “nekatuak gaude, baina hori ezin da aitzakia izan”. Hitzorduz betetako hilabete hau arrakastarekin amaitu dute irundarrek eta bukaera borobila eman nahiko diote biharko neurketarekin. Cuetarak ere gauza bera azpimarratu du: “Gure onena eman behar dugu, eta bi puntuak etxean gelditzea lortu behar dugu. Oso garrantzitsua izango da gure aurkariekin aldea irekitzeko”.

Garaipenak ospatzeko ekitaldiak

Taldea animatzeko eta azken asteetan lortutako garaipenak ospatzeko, Bidasoa klubak hainbat ekitaldi antolatu ditu bihar arratsalderako. Alde batetik, klubeko bazkide direnak lagun bat eramaten ahal dute dohainik biharko neurketaz disfrutatzeko. Horretarako, bazkideek sarrerak bihar goizeko 11etatik 13:30eak bitartean eta arratsaldeko 15:30tik 17:30ak arte biltzeko aukera izango dute.

Gainera, inauteriak direla eta, Bidasoak horiz mozorratuta joateko gonbitea egin die zaleei. Horrela, jantziak agertzen diren guztiak zozketa batean parte hartuko dute taldearen jantzia irabazteko. 

(Argazkia: Alejandro Nieto)