BIDASOAK AGUR ESAN DIO EHF LIGAKO TXAPELKETARI

Atzo GOG talde daniarraren aurka 33-31 galdu ondoren, Bidasoak ez du lortu hurrengo kanporaketarako txartelik

Bidasoak atzo jokatu zuen, Gudme hirian, EHF Ligako Last 16 kanporaketako itzulerako neurketa, GOG taldearen aurka. Bi puntuko abantailarekin zeuden daniarrak partidua hasi aurretik, eta 4-0koarekin amaitu zuten atzoko jardunaldia, 33-31ko markagailuarekin irabazi ondoren. Horrela, Bidasoak ez zuen hurrengo kanporaketarako txartelik irabazi eta agur esan behar izan zion aurtengo EHF European League txapelketari.

Partidua hasi eta Bidasoak izan zuen lehenengo abantaila, Kauldi Odriozolak eta Rodrigo Salinasek sartutako golekin. Hala ere, beste bi jokalari bi minutuko zigorrarekin kanporatuak izan ziren, Thomas Tesoriere eta Adrian Fernandez hain zuzen ere, eta honek etxeko taldeari 3-0ko partziala egitea ahalbidetu zion. Hortik aurrera, GOG nagusi izan zen lehen zati guztian zehar eta bi taldeen arteko errenta handitzen joan zen, zortzi goleko aldea eduki arte.

Atsedenaldira 20-12ko markagailuarekin iritsi zen neurketa, eta aldageletan Bidasoak indarra hartzeko aukera izan zuen. Horrela, irundarrek bigarren zati ona jokatu zuten. Lehenengo 30 minutuetan taldea ez zegoela neurketan sartuta ematen bazuen arren, azkeneko erdian Xoan Ledok atean eta beste jokalariak erasoan dinamika ona erakutsi zuten. Fernandezek, Ander Ugartek eta Odriozolak 0-3ko partziala ere lortu zuten eta zortzi goleko alde hori, bostera murriztu zuten (22-17, 37. minutua). Julen Aginagaldek ere, beste gol batekin, laura jeitsi zuen errenta, eta azken hamar minutuetan, Fernandezek berriz 30-28ko markagailua ezarri zuen. Bidasoa berdinketaren bila joan bazen ere, ezin izan zuen markagailuko hutsunea gehiago murriztu. Eneko Furundarenaren zigorra aprobetxatuta, etxeko taldeak erantzun eta bi goleko aldea mantentzea lortu zuen, 33-31koarekin neurketa amaituz.

Bigarren zatian indarra erakutsi bazuten ere, irundarrek ezin izan zuten GOG talde handia garaitu eta beraz, hurrengo kanporaketarako txartela daniarrentzat izan zen. Hala ere, Bidasoari oraindik borrokatzea geratzen zaio hurrengo denboraldian, berriz ere, Europako Txapelketa jokatzeko aukera edukitzeko. Horretarako Asobal Ligan lehiatzen jarraitu beharko dute eta horretarako hurrengo hitzordua larunbatean izanen dute, Artalekun. Oraingo honetan, Viveros Herol BM taldea jaso beharko dute, arratsaldeko 18:30ean.

Fitxa teknikoa

33 – GOG (20+13). Hallgrimsson, Tollbring (9, 5 p.), Madsen (6, 4 p.), Kildelund (2), Bergendahl (5), Zachariassen (4), Olsen (1); Dorgelo, Pytlick (5), Larson, Jorgensen (1), Laerke, Als, Vlastos, Clausen.

31 – Bidasoa Irun (12+21). Ledo, Ugarte (2), Zabala (1), Odriozola (10), Salinas (1), Rodríguez (3), Fernández (4, 2 p.); Sierra, Furundarena (2), Aginagalde (4, 1 p.), Mujika (1), Tesoriere, Francisco da Silva, Nieto (1), García (1).

Partzialak. 3-2, 6-3, 9-5, 12-8, 15-10, 20-12; 22-15, 24-18, 26-20, 29-23, 30-27, 33-31.

Epaileak. Georgios Panayides eta Marios Andreou (Zipre). Etxekoen aldetik, Zachariassen (2) eta Bergendahl zigortu dituzte bi minutuz. Bidasoa Irunen aldetik, Tesoriere (2), Fernández, García, Nieto eta Furundarena.

Bestelakorik. EHF European Leagueko Last 16ko itzulerako neurketa Gudmeko Phønix Tag Arena kiroldegian, 1.648 zaleren aurrean, horien artean, Bidasoako jokalari izan zen Uffe Fredsgaard.