BIDASOA TXAPELDUNORDE!

Bidasoaren historian hirugarrenez Sacyr Asobal Ligako bigarren izatea lortu du talde irundarrak. Neurketa bizi baino biziagoan, 29-24 mendean hartu du Fraikin Granollers.

Pozik eta etxeko lanak eginda utziko dute Bidasoa Iker Serranok, Adrian Crowleyk eta Sergio de la Saludek. Hirurek 2018-2019 denboraldiko txapeldunordetza eskuratu zenean taldearen parte garrantzitsu izan ziren, eta lorpen berarekin utziko dute talde irundarra. Bihotza eta burua erabili du Bidasoak bolada bikainean zetorren Fraikin Granollers garaitzeko. Jacobo Cuetararenak atsedenaldira 6 goleko errentarekin iritsi dira eta talde kataluniarrari ezinezkoa egin zaio markagailuari buelta ematea.

Bidasoaren grina.

Artalekun jokatzen zuten denboraldiko azken neurketa izan da gaurko, era berean, garrantzitsuena. Bidasoak bazekien, gogotik prestatu du astean zehar eta lehen zatian, jarrera oldarkor eta ezin hobeagoarekin irten da talde irundarra.

Nahiz eta lehen bi golak talde kataluniarrak egin, azkar batean, lehen zatiko lehen partzial nagusia erdietsi du Bidasoak. De la Saludek eta Julen Aginagaldek birritan, 0-2koa 3-2koan bihurtu dute. Lehen minutuetan, horrelako neurketetan esperientzia duten jokalariek ezarri dute sosegua talde irundarrean. Salinasen eta Crowleyren golen bitartez, 4-3 aurreratu da Bidasoa. Orduan, Granollersek indarrak atera eta Gassamaren bi golen ondotik, 5-5 ezarri du markagailuan.

Neurketa berdinduta zegoelarik, 15.minutuaz geroztik heldu da Bidasoaren kolpe nagusia. 9-6 aurreratu dira, Esteban Salinasek eta Gassamak 9-8 hurbildu dute Fraikin Granollers, baina Bidasoa oso zuzen zuen norabidea. 4-0eko partziala erdietsi du talde irundarrak eta 13-8 aurretik jarri da. Minutu ugari eman ditu Granollersek jokalari bat gutxiagorekin eta garesti ordaindu du lehen zatian. Bi gutxiagorekin ere aritu da talde kanpotarra, Sastre atezainak falta arriskutsua egin dio Caverori eta neurketatik kaleratua izan da.

Erasoan bezain ongi atzean moldatu da Bidasoa. Xoan Ledok 9 geldiketa egin ditu lehen zatian (orotara 14) eta Matheus Da Silva brasildarra gaindiezin aritu da defentsan. Ez bakarrik Da Silva, talde osoaren jarrera defentsan zoragarria izan da. Julen Aginagalderen defentsako jokaladia horren adierazle izan da: Granollersek baloia ostu du, Sergi Francok kontra erasoa sortu du eta atzetik, Julen Aginagaldek, azerien antzera lapurketa itzularazi dio. Horrela, sei goleko alde nagusiarekin joan da atsedenaldira Bidasoa (16-10).

Granollersek saiatu eta Bidasoak eutsi. 

Errenta bikaina zuen Bidasoak, baina eskubaloian gauza zailagoak ere ikusitakoak gara. Antonio Garcia Robledo markagailua irauli nahian temati atera da bigarren zatian, 19-16 hurbildu du Granollers. Alarma gorria piztu beharrean, Bidasoak sosegua erakutsi du eta bikain jakin du lehen zatian eskuratutako aldea mantentzen.

Bigarren zati osoan zehar, lau goleko aldea eroso mantendu du Bidasoak. Hiru goletara hainbatetan gerturatu da Granollers, baina neurketaren kontrola ez du inoiz arriskuan ikusi talde irundarrak. Bigarrenez, Garcia Robledo-Salinas bikoteak hiru goletara gerturatu du Granollers (25-22, 53.minutuan), Granollerseko jokalari inspiratuenak aldea murrizteko esperantzak mantendu dituzte beren taldearentzat.

Estutu ordez, azken bost minutuetan lasaitasuna heldu da. Julen Aginagaldek eta Mikel Zabalak birritan Pol Valera atezainaren atea zulatu dute, Xoan Ledok geldiketa ikusgarria egin dio Esteban Salinasi eta eguneko azken gola, nork eta Sergio de la Saludek sinatu du. 60 minutuak igaro dira, Bidasoak 29-24 irabazi dio Granollersi, Sacyr Asobal Ligako txapeldunorde bilakatu da eta jokalari zein teknikariek denboraldi gogoangarri honen azken garaipena behar bezala ospatu dute. Zoramena piztu da Artalekun, baina eztanda txikia izan da kiroldegia hutsik baitzegoen. Biharko egunean, Bidasoaren 300 zaletuk harrera beroa egiteko beta ezin hobea izango dute.

Fitxa teknikoa 

29 - Bidasoa-Irun (16+13): Ledo (Sierra) Cavero (4), Crowley (1), Julen (5), Salinas, De la Salud (4), Azkue (6, 2 pen.); Racotea (2), Zabala (3), Gey-Emparan, Serrano (4), Tesoriere, Da Silva, Nieto eta Bonanno.

24- Fraikin BM Granollers (10+14): Sastre (Varela ); Lancina, Marc García, Alejandro Márquez (1), Martínez, Gassama (5), Rey (1); Gurri, Pérez (1), Chema Márquez (1), Valera (1), Salinas (7), Franco eta Antonio García (7, 3 pen.).