Bidasoa Irunek garaipen estua lortu zuen Benidormen kontra

Bidasoa Irunek lan egin behar izan zuen Benidormen kontra garaipena eskuratzeko. 31-30eko markagailu estuarekin eskuratu zituen jardunaldiko bi puntuak eta horrela, Plenitude ASOBAL Ligako helburuei eusteko lehen urratsak eman ditu talde horiak. 

Neurketa berdindua jokatu zuten pasa den larunbatean Bidasoak eta Benidormek Artalekun. Ez talde batek, ez bertzeak ere, ez zuen hiru gol baino gehiagoko errenta eskuratu ordubete osoan. Azken jokaldira arte berdinduta egon ziren taldeak eta orduan, Asier Nietoren golari esker, garaipena etxekoen alde erori zen. 

Lehen zatian errenta Benidormen aldekoa izan zen, 3-5eko tarterik handiena lortuz. Bidasoari markagailua iraultzea egokitu zitzaion eta horrelaxe egin zuen. 7-6koa ipini zuen emaitzan etxeko taldeak, baina hala ere, ezin izan zuen bisitariak ezarritako erritmoa gelditu eta euren joko propioa kantxaratu. Atsedenaldira, edonola ere, irabazten joan ziren horiak (15-14). 

Bigarren zatiaren hasieran, berriz ere Benidormek hartu zuen aitzina, etxekoen garaipena kolokan jarriz. Azken ordu erdian berdintasuna izan zen nagusi markagailuan eta bukaera artea ez zen partidua erabaki. 30nako emaitza zutenean, Alex Mozasek hutsartea eskatu eta hau ongi aprobetxatu zuen. Izan ere, honen bueltan, Asier Nietok jokaldi erabakigarria egin zuen, azken segunduetan gola sartuz eta garaipena ere eskuratuz, behin-betiko 31-30eko emaitza ipiniz. 

Honen ondotik, Bidasoa Iruni lau jardunaldi gelditzen zaizkio Plenitude ASOBAL Ligako lehen itzulia bukatzeko. Hurrengo neurketa berezia izanen da gainera, euskal derbia jokatuko dutelako Helvetia Anaitasunaren kontra, Iruñean. Partidu hau igandean ospatuko da, abenduaren 8an, 18:30ean. Artalekun jokatuko duten hurrengoa berriz, abenduaren 13an (ortziralean), ospatuko da Recoletas Atletico Valladolid taldearen kontra, 20:45ean.