Bidasoa Irunek azken minutuan galdu zuen Limogesen kontrako partidua

Bidasoa Irunek 32-31ko markagailuarekin galdu zuen atzo Limoges kontra, Europko Txapelketako Mainz Roundeko bigarren jardunaldian. Talde horia aitzinetik mantendu zen ia partidu guztian zehar, baina azken aukerak ongi aprobetxatu zituzten etxekoek eta azken segunduetan garaipenaren gola eskuratu zuten, jardunaldiko bi puntuak ere poltsikoratuz. Honen ondotik, elkarren kontra arituko dira bi taldeak berriz ere heldu den asteartean (otsailaren 25ean), Artalekun, 20:45ean. 

Bi taldeak garaipenaren bila kantxaratu ziren Limogesen atzo arratsean. Lehen hiru minutuetan golik sartu gabe aritu ziren biak, baina bertakoak izan ziren markagailua irekitzen lehenak. Hala ere, hurrengo jokaldietan, 1-4ko partziala lortu zuen Bidasoak eta aitzinetik jarri zen (3-5). Leo Macielen lan onari esker, Limogesek ezin izan zituen bere saiakera guztiak gauzatu eta talde horiak irekitako zuloa ixten saiatu baziren ere, bidasotarrek nagusitasuna mantendu zuten atsedenaldira bidean ere. Bidasoa Jevtic eta Esteban Salinas gabe gelditu zen orduan, baina zailtasunei aurre eginez, bi goleko aldeari eutsi eta 15-17ko emaitzarekin joan ziren bi taldeak aldageletara. 

Bigarren zatian, defentsan intentsitate handiarekin aritu ziren etxekoak, baina Salinas anaiak erasoan ere fin ibili ziren eta emaitza euren alde mantentzen segitu zuten. Azken ordu erdian nagusitasuna Alex Mozasen taldearena izan zen, nahiz eta azken hamar minutuetan abantaila murrizten jakin zuen Limogesek. Bidasoa ezin hobe ibili zen, bai defentsan baita erasoan ere, garaipenak ihesik ez egiteko, nahiz eta etxekoak 31ra berdindu zuten azken bost minutuetara. Azken momentuak tentsio handikoak izan ziren, markagailua edonorren alde eror zitekeelako. Hala ere, Bidasoak eskuetan zuen garaipena lortzeko aukera, nahiz era Boskosek aurkariaren atean aitzinera egin eta erasoan falta bat egin. Horrela, azken segunduetan, Limogesen alde erori zen partidua. Erasoan ari zirela, epaileak 7 metroak adierazi zituen eta beraz, etxekoek hori ongi aprobetxatuta, gola sartu eta garaipena poltsikoratu zuten, 32-31ko markagailuarekin. 

Europako Txapelketa hurrengo asteartean, otsailaren 25ean, bueltatuko da Artalekura (20:45), hain zuzen ere, Bidasoa eta Limogesen kontrako neurketarekin berriz ere. Horren aitzinetik ordea, talde horiak Huesca bisitatuko du Plenitude ASOBAL Ligari segida emateko, ortzirale honetan (otsailaren 21ean), 20:30ean. 

Gorka Nieto jokalari eta kapitainak egin du partiduaren balorazioa.