Beti Gazteko gizonezkoek soilik lortu zuten garaipena eskualdean

Gipuzkoako Ligan, Ohorezko Erregional mailako Beti Gaztek 0-1 galdu zuen pasa den ortziralean etxean, Hernani Bren kontra. Ainara Otxoteko taldeko bigarren entrenatzaileak aipatu du bazekitela partidu zaila izanen zela eta nahiko parekatu hasi zirela bi taldeak. Hala ere, zorte txarreko jokaldi batean, hernaniarrek gola sartu eta horrela gelditu zen markagailua. Bigarren zatian, nahiko modu itsusian aritu zirela ere onartu du, futboletik at dauden jokaldiak edukita. Horrela, hurrengo asteetara begira, bertze neurketa zailak ere heldu direla aurreikusi du Otxotekok, baina saiatuko direla ahalik eta lan onena egiten. 

Beti Gazteko Ohorezko Erregional mailako gizonezkoek berriz, 1-0 irabazi zuten igandean Aloña Mendi taldearen kontra. Euren joko onena erakutsi ez bazuten ere, lesakarrak pozik gelditu ziren lortutako hiru puntuekin, Javier Escagües entrenatzaileak adierazi bezala. Erregional mailan, igoera fasean, Gure Txokoak porrota jaso zuen Mondragon B taldearen kontra, 1-0eko markagailuarekin.

Nafarroako Ligan berriz, Lehen Maila Autonomikoan, Baztanek 1-0 galdu zuen baita ere Ilumberri taldearen kontra. Sergio Oskoz prestatzaileak azpimarratu du aurkaria azken postuan zegoen taldea zela eta bazekitela puntuak irabaztea joanen zirela. Zelaiaren egoerak ere baldintzatu zuen jokoa eta baztandarrei ez zien mesede egin bertan ikusi zen jokamoldea. Atsedenaldira bidean sartu zuen Ilumberrik gola, penalti bidez, nahiz eta bi taldeek ere ez zuten garbi horrela zenik. Bigarren zatian, erritmoa handitzen joan ziren baztandarrak, baina ezin izan zituzten aukerak sortu eta garaipena aurkariarentzat izan zen. 

Azkenik, Preferente mailan, Doneztebek binako berdinketa lortu zuen Gazte Berriak taldearen kontra. Bigarren sailkatua bisitatuko duten doneztebarrek, lider moduan, eta zapore gazi gozoarekin bukatu bazuten ere, puntu bat eskuratu zuten, bi taldeen artean dauden bost puntuko tartea mantenduz eta Doneztebek ere bere lidergotza sendotuz.