Beti Gazteko gizonezkoek nagusitasunez garaitu zuten Anaitasuna

Baztan-Bidasoaldeko futbol talde nagusiek bertze jardunaldi bat ospatu zuten asteburuan. Gipuzkoako Ligari dagokionez, Ohorezko Erregional mailako Beti Gazteko gizonezkoek 5-0 garaitu zuten, Mastegin, Anaitasuna taldea. Jon Zabalak sartutako lau golekin, eta Asier Larraldek lortutako bertze batekin, hiru puntu garrantzitsu batu zituzten lesakarrek sailkapenean, beheko aldetik urruntzeko helburuari segika. 

Klub eta mailako bereko emakumeek berriz, ezin izan zuten Intxaurdi garaitu. 3-0eko markagailuarekin galdu zuten Beti Gaztekoek eta, bertze asteburu batez, partidu zaila izan zuten. Hala ere, sentsazioak onak izaten segitzen dute eta hortan sinetsita, garaipena ere helduko dela badakite. Erregional mailako Gure Txokoak azkenik, bana berdindu zuen Antigua Luberrirekin. 

Nafarroako Ligan, Lehen Maila Autonomikoko Baztanek 1-2ko markagailuarekin garaitu zuen Mutilvera B taldea. Lesioek baldintzatuta jokatu dute baztandarrek azken asteetan eta hortik poliki-poliki berreskuratuta, hiru puntuak eskuratzeko gai izan ziren aspaldiko partez. Orain, indarberrituta, bide horri eutsiko diote hurrengoetan ere. 

Azkenik, Preferente mailako Doneztebek denboraldiko lehen partidua galdu zuen asteburuan Mendigorrian, bertako Mendi taldearen kontra. 2-0eko markagailuarekin puntuak galdu zituzten, nahiz eta honek ez duen eraginik eduki sailkapenean. Lidergotzan segitzen dute doneztebarrek, Gazte Berriak bigarren sailkatuarekin bortz puntuko aldea dutelarik. 

Javier Escagües eta Ainara Otxoteko Beti Gazteko entrenatzaileak eta Sergio Oskoz Baztango prestatzaileak egin dizkigute partiduen balorazioa.