Beti Gazteko gizonezkoek bigarren garaipena segidan lortu zuen asteburuan

Gipuzkoako Ligan, Beti Gazteko Ohorezko Erregional mailako gizonezkoek bigarren garaipena segidan lortu zuen asteburuan Beasain B taldearen kontra. 0-4ko markagailuarekin irabazi zuten lesakarrek eta pozik bueltatu ziren hiru puntuekin etxera, maila mantentzeko helburua lortzeko urrats berriak paratuz. Bolada on honi segida eman nahi diote eta gogoz begiztatzen dute hurrengo erronka etxean. Oiartzunen kontra ariko baitira lesakarrak, Javier Escagües entrenatzaileak kontatu duenez. 

Maila eta klub bereko emakumeek berriz, 90. minutuan galdu zituzten jardunaldiko hiru puntuak. Ostadar jaso zuten Mastegin hauek eta aitzinetik jartzea lortu zuten, Olaia Telletxeak sartutako gol bati esker. Markagailua beraien alde mantendu zuten azken momentura arte, baina 90. minutuan, akats baten ondotik, gola jaso zuten kontrara eta puntuak banatu behar izan zituzten, Ainara Otxoteko bigarren entrenatzaileak adierazi duenez. 

Erregional mailan, Gure Txokoak ere garaipena eskuratu zuen, 0-3ko emaitzarekin Landetxari aurre eginda. 

Nafarroako Ligan berriz, Lehen Maila Autonomikoko Baztanek banako berdinketa erdietsi zuen Peña Azagresa taldearen kontra. Sergio Oskoz prestatzaileak baloratu du azken jardunaldi hau eta zapore gazi-gozoarekin bukatu zutela aipatu du. Izan ere, gibeletik egon ziren markagailuan partiduaren zati batean eta azken jokaldian, Elur Meokik gola sartu zuen, emaitza berdintzeko. Saiatu baziren ere, garaipena eskuratzeko denborarik gabe gelditu zen talde baztandarra eta beraz, puntuak banatu behar izan zituzten. 

Azkenik, Preferente mailako Doneztebek 0-1eko markagailuarekin irabazi zuen Beti Casedano taldearen kontra. Neurketa garrantzitsua zen doneztebarrentzat sailkapeneko lidergotzan are gehiago sendotzeko eta helburua lortuta bueltatu ziren etxera. Hiru puntu gehiago batuta, aldeak handitu dituzte sailkapenean bigarren eta hirugarren postuan dauden taldeekin. Orain, 57 puntu dituzte guztira Doneztebekoek, Gazte Berriak baino bost eta Soto Ibarbasok baina sei gehiago.