Beti Gaztek porrota jaso zuen asteburuan Mutrikuren kontra

Gipuzkoako Ligan, Ohorezko Erregional mailako Beti Gaztek 0-3 galdu zuen igandean etxean Mutrikuren kontra. Eguraldi kaskarra eta baldintza okerrak izan zituzten partidua jokatzeko eta azkenean, akats batzuen ondotik, hiru puntuak galdu zituzten lesakarrek. Javier Escagües entrenatzaileak adierazi duenez, nahita ez orain arte errepikatu diren akats indibidualak konpondu beharko dituzte, garaipenak ahal bezain laster biltzen hasteko eta sailkapeneko azken postuagatik ateratzeko. Heldu den asteburuan, Mondragon bisitatuko dute Beti Gaztekoek Arrasaten, igandean, arratsaldeko 16:30ean.

Nafarroako Ligan berriz, Lehen maila autonomikoko Baztanek bina berdindu zuen asteburuan Erriberri taldearen kontra. Lehen gola etxeko taldearena izan zen, Erriberrirena, partidua hasi eta bederatzigarren minutuan eta 1-0ekoarekin joan ziren atsedenaldira ere. Honek ez zuen taldeak amore ematea eragin eta lanean segitu zuten, berdinketa lortu arte. 57. minutuan, Imanol Zocok sartu zuen berdinketaren gola. Hamar minutu beranduago ordea, Erriberrik garaipena eskuratu nahi zuela erakutsi zuen eta bigarren gola sartu zuen, berriz ere markagailuan aitzina hartuz. Edonola ere, baztandarrek segidan erantzun zuten eta hurrengo jokaldian lortu zuten neurketa berdintzea, behin betiko, binako emaitza lortuz. Heldu den asteburuan, etxean jokatuko du Baztanek. Zehazki, larunbatean, abenduaren 14an, arratsaldeko 18:00etan, Lerines taldea jasoko du.

Azkenik, Preferente mailako Doneztebek bertze garaipen bat eskuratu zuen pasa den larunbatean, etxean, Bidezarra Bri 6-1eko markagailuarekin irabazita. Nagusitasunez aritu ziren bertze behin doneztebarrak ta 4-0eko emaitzarekin ailegatu ziren partiduaren azken minutuetara. Bidezarrak gol bat sartzea lortu zuen orduan, markagailuko tartea murriztuz. Hala ere, azken bost minutuetan, Doneztebek bertze bi gol sartu zituen eta aurkariak ezin izan zuen hauen indarraren kontra deus ere egin. Lidergotzan segitzen du Doneztebek, hiru puntuko aldeko tartea duela Gazte Berriak bigarren sailkatuarekin. Heldu den igandean, abenduaren 15ean, Amigo taldea bisitatuko du Doneztebek, arratsaldeko 18:00etan.