Baztanek Peña Azagresa taldea garaitu zuen pasa den asteburuan

Nafarroako Ligan, Lehen Maila Autonomikoko Baztanek 1-3 garaitu zuen pasa den igandean, urriaren 20ean, Peña Azagresa taldea. Intentsitate altuarekin zelairatu ziren baztandarrak eta etxetik kanpo itxura ona eman zuten. Lehen zatian bi gol sartuta eta bigarrenean bertze bat, partidu bukaerara 0-3ko markagailuarekin zeuden bisitariak. Hamar minutu eskas falta zirenean, epaileak baztandarren kontran penalti bat zehaztu zuen eta horrela sartu zuten etxekoek euren gol bakarra. Edonola ere, ez zen nahikoa izan bisitarien nagusitasunari buelta emateko. Bertze hiru puntu gehiagorekin bueltatu ziren Elizondora eta horrelaxe kontatu du Sergio Oskoz taldeko prestatzaileak ere. Honen ondotik, igande honetan, urriaren 27an, Lagunak taldea jasoko dute baztandarrek etxean, 18:00etan.

Preferente mailako Doneztebek banako markagailua erdietsi zuen pasa den igandean ere, Ardoi taldearen kontra. Lehen ordu erdia pasatua zenean sartu zuen Ardoiek gola eta bere alde jarri zuen markagailua, 1-0ekoarekin. Hala ere, amore eman gabe, lanean segitu zuten doneztebarrek eta bigarren zatian, 74. minutuan, Fermin Estangak lortu zuen emaitza berdintzea. Horrela gelditu zen markagailua eta puntu bat ekarri zuten hauek ere Doneztebera. Larunbat honetan berriz, urriaren 26an, Mendi taldea jasoko dute Iñaki Indart zelaian, 17:00etan.