BAZTANEK BANA BERDINDU ZUEN SAN MIGUELEN KONTRA IGANDEAN

Doneztebek berriz, 0-1 galdu zuen Beti Casedano taldearen kontraNafarroako Ligako Baztan-Bidasoaldeko futbol talde nagusiek, atsedenaldi ttiki baten ondotik, martxan daude denboraldiko azken txanpari aitzin egiteko. Ez zuten esperotako emaitzak bildu, ez Baztanek ezta Doneztebek ere, baina bi taldeak ere prest daude azken zortzi neurketetan maila emateko eta denboraldiko helburu nagusiak lortzeko. Lehen maila autonomikoko Baztanek bana berdindu zuen pasa den igandean, apirilaren 7an, San Miguelen kontra. Giltxaurdin jokatu zuten partidua eta zapore gazi gozoarekin bukatu. Galtzen hasi zen Baztango taldea, baina markagailua berdindu ahal izan zuten. Horrez gain, San Miguelek garaipena eskuratzeko izan zuen aukera ezeztatzeko gai izan ziren, euren penalti bat gelditu baitzuen etxeko atezainak. Alde horretatik, pozik gelditu zen taldea, baina hemendik aitzinera itxura hobea eman nahi dutela ere argi du Iban Romo entrenatzaileak. Azken zortzi neurketetan puntuak eskuratu nahi dituzte, mailari eusteko eta, ahal bada, sailkapeneko lehen postuei hurbiletik begiratzeko. Preferente mailako Doneztebek aldiz, martxoaren 27an jokatuko zuten azken asteburu honetan jokatu beharreko partidua. Neurketa aitzindu zuten eta, aipatu bezala, Aste Santuko oporren aitzinetik jokatu. Arratsalde hartan etxean jaso zuen Beti Casedano eta 0-1eko markagailuarekin galdu zuen Doneztebek. Joel Gil bigarren entrenatzaileak aipatu du burumakur joan zirela denboraldiko azken etenaldira, ez zutelako nahi zuten emaitza lortu. Zapore gaziarekin gelditu ziren, bazekitelako neurketa zaila bazen ere, garrantzitsua zela bertan puntuak batzea. Hala ere, prest daude denboraldiko azken txanpari aitzin egiteko eta gelditzen diren jardunaldietan maila emateko. Partidu bakoitza aukera berri bat dela argi dute, eta horrela eginen diote aurre igande honetan, apirilaren 14an, Lezkairun izanen duten partiduari ere.