Aurkari handiegia izan da La Rioja

BIDASOA: Dejanovic, Zubiria, Cavero, Martínez, Crowley (3), Aldaba (3), Nonó (3), Borragán (3), Muiña (5), Mancisidor, Basaric (2), Popovic (1), Lancina (2).

LA RIOJA: Kappelin, Aginagalde, Sánchez (5), Peciña, Montoro (1), Cacheda (5), Jiménez (3), Vigo (4), Garabaya (3), Molina (4), Vinicius (3), Muñoz (1), Fernández (3), Garciandia (1), Hissham (3).

MARKAGAILUA: 2-1, 3-6, 5-9, 6-13, 8-16, 10-19 (atsedenaldia); 11-22, 13-25, 16-28, 19-30, 20-34, 22-36.

Ligako talde indartsuenetako bat hartu du Bidasoak Artaleku kiroldegian, eta ezin izan dio aurre egin. Egoera kaskarrean heldu dio talde irundarrak norgehiagokari, azpimarratzeko moduko hutsuneak izan dituelako: Azkue, Kauldi eta Beltza falta ziren. Iker Serrano azken fitxaketak ere ez du parte hartu, eta Jon Vazquezek epe luzerako lesioa dauka. Gogoz irten dira horiak, eta lehen abantailak lortu dituzte. Baina laster nagusitu zaie Errioxako taldea. 19.minutuan Jacobo Cuétara entrenatzaileak hutsartea eskatu duenean, 6-13 irabazten ari zen La Rioja. Bidasoak baino baliabide gehiago dituela erakutsi du arerioak.

Errioxakoek ez zuten laguntzaren premiarik. Hala ere, bigarren zatia hasi bezain pronto, epaileak Basarici txartel urdina atera dio, eta lehiatik kanpo utzi du. Beranduago Lancinari gorria erakutsi dio, eta erdiko jokalaririk gabe utzi du Bidasoa. Borraganek eta Crowleyk lan hori betetzeko ahaleginak egin dituzten arren, agerian gelditu da ez direla espezialistak. Azken ordu laurdenean, norgehiagoka erabakita zegoela, Aldaba eta Mancisidor harrobiko jokalariak sartu ditu Cuétarak, hegaletan. Aldabak hiru gol sartu dizkio, gainera, Gurutz Aginagalde atezain irundarrari. Partida erosoa izan da La Riojarentzat, eta espero zitekeen porrota Bidasoarentzat.