Alex Mozas: “Partidu zaila izanen da eta arreta osoz aritu behar gara”

Bidasoa Irunek Frigorificos del Morrazo taldea bisitatuko du igande honetan, martxoaren 30ean, 19:45ean. Sailkapenean gora egiteko bertze aukera bat du asteburuan talde horiak eta hau aprobetxatzeko prest daude jokalariak. Hala ere, ez da partidu erraza izanen. Maila mantentzeko lehian badago ere, aurkariak indarra egiten du etxean eta bere zaleek ere ongi bulkatzen dute horretarako. 

Alex Mozas entrenatzaileak erran duen moduan, “denboraldiko partidurik politenetako bat da jokatzeko” Frigorificos del Morrazo taldearen kontrako neurketa. Aurkari “zaila” dela onartu du, batez ere kantxan bertan sortzen den giroagatik: “Kantxan egoten den giroa bizitzea merezi du. Urtero gogoan gelditzen den partidu horietako bat da pabilioia goraino beteta egoten delako, baita zaleek aurkariarekiko duten errespetuagatik ere”.

Frigoríficos del Morrazo taldeak jokalari oso onak dituela ere azpimarratu du Mozasek: “Postu guztietan jokalari oso onak ditu, baita atean ere. Partidu zaila izanen da. Eurek zaleei egin diete neurketa ikustera joateko, azken aldian emaitzak ez direlako onak izan. Baina oso onak dira eta ez dute maila mantentzeko arazorik izanen”. Honen aitzinean, Bidasoak buru-belarri egin beharko dio aitzin aurkariari: “Guk ez dugu akatsik egiteko aukerarik. Arreta osoz aritu behar gara. Defentsan azken aldian egin dugun jokoari segida eman behar diogu eta modu berean lehiatu. Horrez gain, erritmo altua mantendu behar dugu eta erasoan modu argian jokatu”. 

Bidasoak Jakub Skrzyniarz atezaina berreskuratuko du partidu honetarak. Berri ona da hori taldearentzat, Leo Maciel fisikoki berreskuratu daitekeelako horrela. Mozasek dio “Kuba oraindik ere atera egokitu behar dela”, baina “ongi dagoela” eta taldeak bere lana eskertuko duela David Failde eta bere artean aldaketak egiteko.