Alex Mozas: “Partidu hunkigarria izanen da, baina jokoan anitz dago”

Bidasoa Irunek Torrelavega jasoko du bihar, martxoaren 22an, Artalekun (20:00). Sailkapeneko hirugarren postuan dago aurkaria, talde irundarraren aitzinetik, baina puntu bakarrera. Garaipena dute begiz jota beraz, Alex Mozasen jokalariek, irabaziz gero, txapeldunordetza hurbilago izanen luketeelako. 

Pasa den asteazkeneko garaipenaren ondotik, prest dago Bidasoa asteburuko erronkarako. Torrelavega izanen du aitzinean eta irabaziz gero, sailkapeneko hirugarren postua hartuko luke talde horiak. Gaurko entrenamendua izanen da partiduaren aurretik eginen duten azkena eta Alex Mozasek berak aipatu duenez, “jokalariek eta filialeko taldekideak prest daude”. 

Biharko neurketa garrantzitsua izanen da, sailkapeneko goiko aldean dauden talde guztien kontra izanen den bezala. Torrelavega hirugarren postuan dago kokatuta, eta Mozasek onartu duen bezala “lehen itzuli ona egin” zuen. Bigarrenaren hasieran, bi taldeen artean distantzia gehiago zegoen, baina orain parekatuagoak daude eta horiek kantabriarrak pasa ahalko dituzte irabaziz gero. Horregatik beragatik, inportante izanen da biharko partidua. 

Irabazteko gakoa “euren jokalariak kontrolatzean” datza. Horrez gain, “hobeki korri egin eta erasoan, jokalariek askatasuna izan dezaten” izanen da Bidasoaren jokoa. Mozasek “%100eko konfiantza” du bere taldearengan, baina badaki Torrelavega ere bere arma guztiekin etorriko dela Irunera: “Alerta egon behar gara. Gu momentu onean gaude eta beraiek ez hainbertze. Nik ezagutzen ditut hango jokalariak eta azken emaitza txarrei buelta ematera etorriko dira. Gainera, zale asko etorriko dira Artalekura eta horrelakoetan beti neurketa ona egiten du taldeak. Artalekuk hauek isilaraztea lortu behar dugu”. 

Elkar ongi ezagutzen duten bi talde dira, hain zuzen ere, eta Mozasentzat “hunkigarria” izanen da partidua zalantzarik gabe. “Sei urte eman nituen bertan, afizioari estima handia diot eta imajina ezin genezakeen gauzak lortu genituen bertan. Lanean nola ari diren ikusita, ilusio handia egiten dit hain ongia ikustea”, gaineratu du entrenatzaileak. Neurketa hunkigarria bada ere, Mozasentzat garrantzitsuena Bidasoak bertan jokoan duena izanen da.