Alex Mozas: “Orain arte egindako lana borobildu behar dugu eta jokalariak prest daude horretarako”
Bidasoa Irunek Viveros Herol BM Nava taldea jasoko du Artalekun bihar, apirilaren 4an, 20:30ean. Aurkaria sailkapeneko behe aldean kokaturik dago, baina hori ez da etxekoentzat bermea. Lehen itzuliko neurketa dute oroitzapenean, Navan porrota hartu zutenekoa. Arantza hori kendu eta sailkapeneko bigarren postuari begira dago Alex Mozasen taldea eta bi puntuak Irunen gelditzeko asmo garbia du.
Lenen itzulian elkarren kontra jokatutako neurketa du gogoan Alex Mozas entrenatzaileak. 37-33 galdu zuen Bidasoak orduan, Navaren etxean, eta arantza hori kendu nahi du talde horiak oraingoan: “Defentsan ez ginen fin ibili. Gol anitz sartu zizkiguten eta horrela, zaila da ongi lehiatzea. Zehaztasunek erabaki zuten partidua. Oraingoan defentsan ongi ibili behar gara eta trantsizioekin lotura onak egin. Hortik aitzinera, neurketaren bukaerara garaipena eskuratzeko aukerekin iritsi behar gara eta azken minutuetan ongi jokatu”.
Egin beharrekoa argi edukita ere, Mozasek onartu du ez dela erraza izanen, aurkariak talde ona baitu: “Anbizio handiko taldea da eta jokalariek esperientzia handia dute, badakite zer egin behar den ASOBALen irabazteko. Zaila izanen da”. Lesioekin arazoak izan dituen taldea da Nava eta sailkapeneko azken postuetan dago, nahiz eta ez dauden jeitsierara bidean. Horien entrenatzaileak azpimarratu du “ahalik eta goien egoten” saiatuko direla eta “joko garbiarekin jokatuko dutela Artalekun”.
Aurkariari aurre egiteko, Bidasoak bere eskuetan dagoen guztia egin beharko du garaipena eskuratzeko. “Momentu erabakigarrietan estutu behar dugu”, onartu du Mozasek, “dena oso berdindua dago eta ziela izanen da neurketa haustea”. Buru argiarekin aritu beharko da talde horia azken minutuetan eta hortaz gain, “Navak defentsan egiten dituen aldaketak aprobetxatu gola egiteko”. Garrantzitsuena, batez ere, “irabazten segitzea da” entrenatzailearen ustez. “Balorean jarri behar dugu orain arte egindako lana eta hori borobildu. Jokalariak prest daude horretarako”, gaineratu du Alex Mozasek.
