Alex Mozas: “Lehiakorrak izaten ari gara geldialdiaren ondotik eta hori izanen da gaurko helburua ere”

Bidasoa Irunek denboraldiko bigarren itzuliko egutegi beteari segida emanen dio gaur, 20:45ean, Limoges taldearen kontra jokatuko duen Europako Txapelketako Main Round-eko bigarren jardunaldiarekin. Multzoko taldetik indartsuenetako bat bada ere, orain arte erakutsitako lehiakortasunari eutsiko dio Alex Mozasen taldeak garaipena eskuratzen saiatzeko. 

Geldialdiaren ondotik hasi den denboraldiko bigarren itzulia “exijentea” izaten ari dela dio Alex Mozas entrenatzaileak. Maila altuko aurkariak ditu Bidasoak hasiera berri honetan, nahiz eta eurek ere maila ematen ari diren: “Lehiakorrak izaten ari gara eta helburu hori izanen dugu gaur ere”. Limoges bisitatuko dute gaur horiek, “multzoko plantillarik onena” duen taldea hain zuzen ere. Hala ere, “Ligan eta etxean ez dira denboraldi ona egiten ari”, Mozasen hitzetan, eta horrek “itxaropena” ematen die bidasotarrei.

Benficaren antza hartzen dio prestatzaileak gaurko aurkariari, batez ere joko estiloan: “Estilo espainiarra du taldeak eta ezagunak ditugun jokalariak daude bertan, Europako Txapelketan egonkortuak daudenak gainera. Hori baliagarria izanen zaigu, badakigulako nola jokatzen duten. Entrenatzaileak ere bere estilo ematen dio taldeari eta horregatik, badakigu partidu deserosoa izanen dena eta ongi egon beharko dugula bertan”.

Bartzelonan egindakoa errepikatu nahi du Bidasoak, “defentsan orain arteko partidurik onena” egin baitzuten Mozasen iritziz. Horrela, “defentsan hobeki egoteko neurketa” planteatuko dute horiek, eta erasoan, “jokalarien bakarkako kalitatea” ere aprobetxatuko dute. Horrez gain, aurkariaren atezaina “deseroso” egotea bilatuko dute. Honekin guztiarekin, neurketa aitzinera ateratzen badute, hurrengo asterako baliagarria izanen dela argi dute bidasotarrek: “Partidua aurrera ateraz gero, nekea kontuan hartuta, izugarria izanen litzateke, batez ere etxean jokatuko dugun neurketari begira. Beraiekin konparatuz, gu zein lekutan gaudean ikustea da ideia, eta etxean hartzen ditugunean aurrerapausu bat emateko aprobetxatzea”.