Alex Mozas: “Irabazi nahi dugu eta uste dut lortu dezakegula”

Espainiako Kopan lehiatzen hasiko du Bidasoa Irunek 2025 urtea, Lanzaroten. Txapelketa ofizialak hasiko dira eta talde horia prest dago horiei aitzin egiteko. Lehen aurkaria Barça izanen da eta ahalik eta partidurik onena egiten saiatuko dira irabazi ahal izateko. 

Alex Mozas entrenatzaileak aipatu du, “azken hilabete eta erdia gogorra izan da prestaketei dagokionez”. Lan karga handia izan dutela gaineratu du, baina pozik agertu da prestatzailea: “Nazioarteko hitzorduek eraginda, jokalari batzuen baja izan dugu, baina filialeko jendea izan dugu gurekin lanean eta ongi. Kantxatik kanpoko berriek ere hilabete eta erdi ona izatea eragin du, izan ere, zenbait jokalarik berritu dute eta hori ona da klubarentzat”. 

Otsaila bete-betean izanen du Bidasoak eta lehen hitzordua asteburu honetan ospatuko du, Lanzaroten. Espainiako Kopa jokatuko da bertan eta larunbatean jokatuko du finalerdia Bidasoak Barçaren kontra. Zaila izanen bada ere argi du Mozasek aurre egiten ahal diotela talde kataluniarrari: “Aukerak izan ditzakegu, nahiz eta munduko talde onenetarikoa izan. Edozein aurkari zaila izanen litzateke eta Barça egokitu zaigu. Norbaitek aurre egiten ahal badio, gu gara”. 

Gakoa Barçaren kontraerasoak gelditzen egonen da: “Eurek gol anitz lortzen dituzte kontraerasoan eta guk defentsan lan handia egin beharko dugu, kataluniarrek laster egitea ekidinez. Horrez gain, beraien atea maila hoberenean ez egotea espero dugu, baina hori ez dago gure esku”. Barça, maila indibidualean, hobea dela ere argitu du Mozasek, baina talde bezala Bidasoak indar handia egin dezake eta horretan erreparatuko dute batez ere, larunbateko partiduan. 

Azken finean, “emaitza edozein dela ere, zerbait positiboa ateratzeko” gai izanen direla dio entrenatzaileak. Taldea “motibaturik dago eta konbentziturik lan ona egin dezakeela”. Jarrera horrekin eta, irabazita, historia egiteko gogoz joanen dira Lanzarotera Bidasoako jokalariak. Larunbatean, 17:15ean, Barçaren contra ariko da Bidasoa Espainiako Kopan, 2025eko txapelketa ofizialei hasiera emanda.