Alex Mozas: “Huesca talde arriskutsua izan daiteke eta errespetuz joanen gara bere etxera”

Bidasoa Irunek Bada Huesca bisitatuko du bihar, otsailaren 21ean, Plenitude ASOBAL Ligako 18. jardunaldia jokatzeko (20:30). Entrenatzeko denbora gehiegirik gabe eginen diote aitzin partidu honi, baina azken asteetako indar berarekin joanen dira Huescara, baita aurkariari zor dioten errespetu guztiarekin ere. 

Azken asteetan talde indartsuak izan dituzte aitzinean Bidasoako jokalariek eta zauri gehiegirik gabe atera dira handik. Pentsamolde berarekin joanen dira oraingoan Huescara, bertako taldearen kontra lehiatzera. Alex Mozas entrenatzaileak erran duenez, “errespetu guziz” eginen diote aitzin neurketa berri honi, Huesca merezi duena baino postu batzuk beherago baitago bere ustez. 

Huesca “beti ongi aritzen den taldea” dela dio Mozasek, “urte anitz daramatza entrenatzaile berarekin eta Ligan esperientzia du”. Hala ere, aurtengo denboraldian, zorte txarra izan dute lesioekin, prestatzaileak kontatu duenez, eta horrek baldintzatu egin ditu. Neguan fitxaketa onak egin dituzte eta bigarren itzuli honetan indartsuago egotea espero dute. Honez gain, Aragoikoen “erasoa” nabarmendu du entrenatzaileak, batez ere “Miguel Malo jokalaria, 100 gol sartu dituela dagoeneko”. “Talde arriskutsua da eta errespetu guztiarekin joanen gara hara”, gaineratu du. 

Bidasoari nekea pilatzen ari zaio eta entrenamendu falta ere somatzen du, nahiz eta partiduak baliatzen dituen horretarako: “Gaurko entrenamendua nahikoa izatea espero dut. Ez dugu denbora gehiagorik. Detaileak prestatuko ditugu fisikoki ahalik eta hobekien ailegatzeko biharko partidura eta bertan lehiatzeko”. Neke hori apaltzeko, minutuak banatzen ari dira jokalarien artean eta hori lagungarria izan daitekeela uste du Mozasek.