Albert Carbó: “Ponferradinaren kontrako partiduak asko exijitu gaitu astean zehar ere”

Real Unionek Ponferradina bisitatuko du igande honetan, apirilaren 6an, 12:00etan. Azken bi neurketetan berdinketa erdietsi ondotik, hiru puntuak irabazi nahi dituzte oraingoan txuribeltzek. Hala ere, ez da erraza izanen. Sailkapeneko hirugarren postuan dagoen taldea da aurkaria eta bere etxeko zelaiak asko exijituko du. 

Azken bi asteburuetan ez du garaipenik lortu Ponferradinak, baina hau “ezin dela kontuan hartu” onartu du Albert Carbók. “Sailkapeneko hirugarrena da eta horrek orain artean ongi egindako guztia erakusten du”, gaineratu du. Horrez gain, bere etxean jokatuko du, bere zaleekin eta horrek ere txuribeltzei asko exijituko diela azpimarratu du entrenatzaileak: “Jendeak estutzen du han eta exijentzia maila oso altuan aritu beharko gara. 90 minutuetan ez ezik, astean zehar ere asko exijitu gaitu partidu honek”. 

Ongi landutako talde bat dela jakinarazi zu Carbók: “Lauko edo bosteko lerroekin aritzen dira eta ongi landuak dituzte biak, bai erasoan, baita defentsan ere. Arriskua sortzen dute eta aurkariari estutu”. Honen aitzinean, Real Unioni “talde moduan defentsa ona” edukitzea eskatuko dio, baita “ausardia ere, defentsan zuloak harrapatzeko”. 

Zortzi jardunaldi gelditzen dira denboraldia bukatzeko, 24 puntu jokoan. Azken aldian, bi berdinketa erdietsi ditu talde txuribeltzak eta hori ona izan bada ere, hiru puntuak batera aterako dira zelaira igandean: “Azken bi neurketetan aukerak izan ditugu irabazteko, baina ez dugu lortu. Orain, denboraldiko zelai zailenetariko batera bagoaz ere, planteamendu bera izanen dugu”. Etxean jokatzea balio erantsi bat da Real Unionentzat, baina bisitari moduan irabazteko prest dagoela argi du taldeko entrenatzaileak.