Albert Carbó: “Partidu konpleto bat egin behar dugu irabazi ahal izateko”

Real Unionek Andorra jasoko du bihar (martxoaren 28an) Galen, 20:30ean. Cultural Leonesa taldearen kontra emandako maila gogoan dute eta hori bera erakutsi nahi dute zaleen aitzinean ere. Hiru puntuak eskuratzeko beharretan dago Albert Carbóren taldea, jeitsiera postuetatik ahalik eta azkarren urruntzeko. Horretarako ordea, maila hoberena eman beharko du talde txuribeltzak, bai erasoan baita defentsan ere. 

Denboraldia bukatzeko bortz neurketa gelditzen zaizkio etxean jokatzeko Real Unioni. Horietako lehena bihar ospatuko da, martxoaren 28an, 20:30ean. Albert Carbók argi du bortz horiek izanen direla jeitsiera postuetatik aldentzeko gakoak: “Etxean indartsu izan behar gara eta ahalik eta puntu gehien batu bertan, gure zaleen aitzinean”. Hala ere, Galera etorriko den aurkariak ez dio etxekoei garaipena ahalbidetuko. Andorrak bisitatuko du Irun, sailkapenean gora egitea helburu duen taldea hain zuzen ere. 

Oraindik gogoan du Real Unionek, pasa den ateburuan, Cultural Leonesaren kontra jokatutako neurketa. Entrenatzaileak oroitu duenez, “Leonen erakutsi genuen edozeinen kontra lehiatzeko gai garela, eta gugan konfiantza berreskuratu genuen partidu horretan”. Gaineratu duenez, “Culturali baloia kentzeko gai izan baginen, gauza bera egin dezakegu Andorraren kontra ere”. Azken bi neurketetan ez du garaipenik batu talde bisitariak, baina horrek ez dio gaitasunik kentzen: “Jokalari oso onak dira eta errespetu handiz hartu behar ditugu”. 

Andorraren inguruan mintzatuta, “baloiarekin talderik onenetakoa” dela azpimarratu du Carbók. Erasoan “jokalari oso onak” dituela gaineratu du, eta “aulkitik ere jokalari oso onak sartzen” direla. Prestatzaileak aipatu du “euren estiloa baloiarekin jokatzean oinarritzen dela, baina baloi gabe ere guti ematen” dutela. Honen guztiaren aitzinean, Real Unionek “partidu konpletu bat egin behar du irabazi ahal izateko”.  

Jeitsiera postuak hurbil ditu talde txuribeltzak eta maila mantentzea “garesti” dagoela onartu du Carbók: “Real Union bigarren itzuli oso ona egiten ari da, baina lanean segitu behar dugu eta puntuak batzen segitu. Maila mantentzea garesti izanen da. Guk argi dugu lan ona egiten ari garela eta badakigu zein den taldeak segitu behar duen ildoa. Orain soilik partidu honi begira ari gara, Andorraren kontra hiru puntuak atera eta ahalik eta azkarren jeitsiera postuetatik aldentzeko”. 

Zelaiaren egoera ere izan du hizpide entrenatzaileak, aste euritsu baten ondotik hori baita kezka: “Gal gero eta hobe dago eta taldea prest egon behar da edozein aurkariri aurre egiteko”. Stadium Galez solas egiterakoan, ezinbertzean aritu da Carbó Real Unionen zaleez ere. Euren bultzadaren beharra azpimarratu du etxean jokatuko diren azken jardunaldi hauetan, eta taldeak horretan duen ardura ere aipatu du: “Zaleak hurbil sentitu ditugu orain arte eta hemendik denboraldia bukatu bitarte, Gal efektua nabaritu behar da. Jokoan asko dugu eta zaleak ondoan behar ditugu. Guk ere berdegunetik hori transmititu behar dugu eta elkarrekin aitzinera egin, Galen hiru puntuak ateratzeko”.