Albert Carbó: “Neurketa serio bat egin behar dugu eta kontzentraturik aritu behar gara 90 minutuetan”

Real Unionek Arenteiro bisitatuko du bihar, abenduaren 14an, 17:30ean. Albert Carbóren agindupean lehen garaipena eskuratu ondotik, taldea motibatura dago puntuak batzen segitzeko. Talde txuribeltzak badaki Arenteiro ez dela aurkari erraza izanen, baina konzentratuta eta defentsan lan ona eginez saiatuko dira puntuak bueltan ekartzen. 

Albert Carbó entrenatzaileak onartu duenez, “Bilbao Athletic-en kontrako garaipenak konfiantza” eman zion taldeari, “beharrezko indar eta energia positiboa” eman baitzien astean zeharreko lanari aitzin egiteko. Horrela, entrenamenduetan lan talde berriak bere detaileak ezartzeko astia izan dute eta konfiantza duen talde bat ikusi dute, “biharko neurketa ailegatzeko gogoz” dagoena. 

Arenteiro izanen du aitzinean Real Unionek O Carballiñon. Azken asteetan “ez du emaitza onik atera”, Carbók jakinarazi duen bezala, “baina horrek ez du erran nahi momentu txar batean dagoenik”. Entrenatzaileak azpimarratu duenez, “arerio zail bat da” Arenteiro, eta “bere lana oso ona da baloiarekin eta baloirik gabe”. Horren arrean, talde txuribeltzak “neurketa serio bat” egin behar duela argi du prestatzaileak eta “konzentratuta egon behar gara 90 minutuz aukerak edukitzeko”, gaineratu du. Hain zuzen ere, talde bisitaria “defentsan blokean aritu behar direla” onartu du Carbók.

Urtea bukatzeko azken hiru partidu gelditzen zaizkio Real Unioni jokatzeko eta horietan pensatzen ari da lan talde berria ere. “Partiduz partidu” joanen direla aipatu du entrenatzaileak eta atsedenaldia ongi baliatuko dutela “taldea eraikitzeko eta denboraldiko bigarren zatiari aitzin egiteko”.