Albert Carbó: “Neurketa kontrolpean eduki behar dugu, batez ere defentsan eta baloi geldiko egoeretan”

Real Unionek bihar, urtarrilaren 17an, emanen dio hasiera denboraldiko bigarren itzuliari. Sestao River taldearen kontra lehiatuko dira, Las Llanasen. Talde txuribeltzak aurkari zuzena du orain, Sestaoko taldea, hiru puntura baitago sailkapenean. Hala ere, azken lau partiduetan ez du partidurik galdu eta sasoi onean dagoen talde bati aitzin egin beharko diote Albert Carbóren mutilek. 

Zamoraren kontrako neurketatik “gauza positiboak” atera dituztela onartu du Albert Carbó Real Uniongo entrenatzaileak denboraldiko bigarren itzuliaren atarian. “Hobetzeko prozesuan gaude etengabean, akatsak zuzendu ditugu eta orain, egoera desberdinetan erakutsi behar dugu lan on hori. Partidu bakoitza, eszenatoki berri bat da, egoera berri bat, eta bertan ikusi behar da akatsak zuzendu ditugula. Horrela, taldeak konfiantza edukiko du, baita segurtasuna ere”, gaineratu du kataluniarrak. 

Eszenatoki berri hori Las Llanas izanen da Real Unionentzat, Sestao River taldearen zelaia. Euren kontra lehiatuko beharko dira bigarren itzuliko lehen jardunaldian eta aurkari zaila izanen dela ere argitu du Carbók: “”Aurkari zuzena da momentu honetan, hiru puntura baitaukagu. Forma onean dago gainera, azken lau partiduetan ez du porrotik ezagutu. Gauzak zailduko dizkigu, baina gugan konfiantza dugu. Gogoz gaude egiten ari garen lan ona erakusteko, beti ere arerioarekiko errespetuz jokatuta. Badakigu bertako zaleek asko bultzatzen dutela, baina konfiantza dugu zerbait positiboa atera dezakegula bertatik”. 

Gakoa “partidua kontrolpean edukitzea” izanen da Real Unionentzat. Sestaok “deus ere gertatzen ez diren partiduak sortzen ditu” Carbóren erranetan eta horrek kontrola edukitzera eramanen du talde txuribeltza, batez ere “defentsan edota baloi geldiko jokaldietan”. Zelaia ere “biguina” dela onartu du prestatzaileak eta belarraren egoerak ere neurketa baldintza dezakeela azpimarratu. 

Edonola ere, gogoz daude txuribeltzak bigarren itzuliari behar bezalako hasiera emateko. Puntuak behar dituzte maila mantentzeko helburua lortzeko eta hori lortzeko gai direla sinesten du Carbók. Berak egiten duen bezala, zaleei ere hortan sinesteko eskatu die gaur goizeko prentsaurrekoan. Horretarako, argi utzi du “gaitasuna handia duen taldea” dela Real Union,  eta  “talde teknikoaren, zuzendaritzaren eta afizioaren eguneroko lanari esker”, baita helburuak lortzeko duten gogoari esker ere, lortuko dutela gora joatea.