Albert Carbó: “Jeitsieratik hurbilago gaude play-offetik baino eta hori aldatu behar dugu”

Real Unionek Cultural Leonesa taldea bisitatuko du bihar, martxoaren 22an, 18:00etan. Lehen RFEF mailako lider sendoa da aurkaria eta neurketa zaila izanen dela aurreikusi du Albert Carbó txuribeltzen entrenatzaileak. Hala ere, sailkapeneko azken postuetatik aldentzeko saiakeran, ahalik eta maila hoberena ematen saiatuko dira Reino de Leon zelaian, ahalik eta puntu gehien ere batzeko. 

Hamaika jardunaldi darama Cultural Leonesak galdu gabe eta Albert Carbó Real Uniongo entrenatzaileak adierazi bezala, “talde guztiek nahiko lituzkete euren puntuak eduki”. Biharko neurketa motibagarria da, alde batetik, liderraren kontra “lehiatzeko gai” direla erakutsi nahi dutelako txuribeltzek. Carbók jakinarazi du, “jokalari onak dituztela, entrenatzaile ona eta afizioa ona ere”. 

Erasoan “arma onak” dituztela goraipatu du prestatzaileak, baita “ordezko jokalarietan ere”. Beraz, honi aitzin egiteko, Real Unionek “konzentrazio maila altua” eduki behar du 90 minutuetan. Horrez gain, “baloia dugunetan, euren defentsaren mailaren pare egon”, aipatu du. Zelaiaren dimentsioak garrantzia izanen duela ere onartu du Carbók. Izan ere, “handia” dela azpimarratu du eta “jokatzeko aukera egonen dela”. Hori dela eta, ezin da lehen itzulian Stadium Galen eta elkarren kontra jokatutako partidua kontuan hartu. Garai harta, baldintza kaskarretan egin baitzioten aurre Culturali eta parekatuak egon zirelako bi taldeak, baloia ez zelako irristatzen. 

Real Unionek bere armak erakusteko jokoa prestatu du aste honetan zehar, eta taldea “lehiatzeko prest” dagoela argitu du entrenatzaileak: “Badakigu partidu zaila dela eta garaipena edo berdinketa eskuratuz gero, sufrituta izanen dela eta partidu ona eginda. Beraiek dira faboritoak, baina guk gure armekin eginen diogu aurre, garaipena eskuratzeko intentzioarekin”. 

Cultural Leonesak Zamoraren kontra jokatutako partidua aipatu du, irabazteko puntuan egon baitziren zamorarrak. Hori ikusita, “aurkariak duen zailtasuna kontuan hartuta beti ere”, Real Unionek garaipena eskuratu dezakeela pentsatu nahi du, asteburu honetako aurkariak galdu egin baitu txuribeltzek garaitu dituzten arerio batzuen kontra. Albert Carbók irabazi nahi duela argi du, puntuak ere beharrezkoak dituelako Irungo taldeak: “Asteburu honetan hiru puntu daude jokoan. Irabazten ez baditugu, saiatzen segituko dugu, bertze 30 puntu daudelako jokoan denboraldi bukatu bitarte. Momentu honetan jeitsieratik hurbilago gaude play-offetik baino, eta gibelean utzi behar dugu hori”.