Albert Carbó: “Gure armak eta gure estiloa ditugu aurkariari irabazten saiatzeko”

Real Unionek Ourense bisitatuko du asteburu honetan, zehazki igandean (martxoaren 16an), 12:00etan. Aurkari gogorra eta partidu zaila aurreikusten du talde txuribeltzak, baina pasa den jardunaldian Arenteiroren kontra lortutako garaipenaren ondotik, konfiantza osoa du erronka berri honi aitzin egiten ahal diola.

Albert Carbó entrenatzaileak Real Unionek “beti irabazi nahi” duela onartu du gaur goizeko prentsaurrekoan, Ourenseren kontrako partiduaren atarikoan. Hala ere, konsziente da taldea asteburu honetako erronkaren zailtasunaz: “Aurkariaren inguruan analisia egiten hasten zarenean, entrenatzaile berria duenetik etxean ez duela galdu hartzen zara. Bere jokoa, bere proposamena, ona eta eraginkorra da. Eszenatoki zaila izanen dugula badakigu, baina konfiantza dugu etxeko azken garaipenaren ondotik”. 

Neurkera irabazteko gakoetako bat “akatsak gutitzean” egonen da, baina Carbók erran duen moduan, “baita aurkaria kontrolatzean ere, partidua gure alde egon dadin”. Honez gain, “baloiarekin gabe jokatzen jakitea” garrantzitsua izanen da Real Unionentzat, Ourensek jende azkarra baitu balorarekin eta beraz, “orain arteko defentsa lanarekin" segitu beharko du igandean ere talde txuribeltzak. Baloia duten momentuan ere, ezinbertzekoa izanen da “sendo” egotea eta aurkariaren defentsa puskatzea. 

Irungo taldeko prestatzaileak argi du aurkaria ona bada, Real Union ere ez dela gibelean gelditzen: “Real Union talde ona da eta, igandean 12:00etan, egoera beretsuan dauden bi talde egonen dira zelaian aurrez aurre. Biak ere garaipena nahiko dute eta Real Unionek hori lor dezake”. Sinetsirik entrenatuko dute gaur eta bihar azken aldiz eta ondotik, autobusean abiatuko dira Galiziara, igandean hiru puntuak bueltan ekartzeko asmoz.